శివోహం

నీ ప్రణవమై ప్రస్తుతించనీ

నీ ప్రళయమై లయము చెందనీ

నీ కోసమై జననమెత్తనీ

నీ తోడుగా మరణమొందనీ ...

నీ జపముకై జీవమవ్వనీ

నీ తపముకై తనువునవ్వనీ 

నీ మంత్రమై మదిని చేరనీ 

నీ భావమై బంధమవ్వనీ ...

నీ గుర్తునై గుడిని చేరనీ 

నీ తలపునై తలుపు తట్టనీ 

నీ గానమై గుండె చేరనీ 

నీ పాటనై పదము కోరనీ ...

నీ శ్లోకమై శోధనవ్వనీ 

నీ శోకమై శరణమవ్వనీ 

నీ ధ్యాసనై ధ్యానమవ్వనీ

నీ మాటనై మవునమవ్వనీ ...

నీ కరుణకై కాటి చేరనీ 

నీ చెలిమికై చితిని చేరనీ 

నీ ప్రాణమై ప్రమిదనవ్వనీ 

నీ దేహమై దగ్ధమవ్వనీ ...

హరహర మహాదేవ

శివోహం  శివోహం