శివోహం

శివా!నీ కేశపాశములు నిండి నింగినంత

జాలువారిన గంగను పట్టేను ఏమి వింత

చిత్రాలకు చిరునామా నీవే తెలిసినంత

మహేశా . . . . . శరణు .

శివా!నీ నేత్ర కళశాల ఒలికిన కారుణ్యమే

ఇల పుణ్య తీర్థాలై  పుడమి నెరిగె

ఏ పూజ ఫలమో ఈ రీతి మాకు దక్కె

మహేశా . . . . . శరణు .

శివా!జన్మలకు మరణమందించు

మరణానికి జన్మలు తొలగించు

ఒక్కసారికి నా మాట మన్నించు

మహేశా . . . . . శరణు .

శివా!ఈ దేహంతో ధ్యానం చేస్తూ

సోహంతో శ్వాసను చూస్తూ

కనలేని దారిలో కదిలి వెళ్తున్నా

మహేశా . . . . . శరణు .

శివా!నిజ తేజమంతా నిలువు కంట నింపి

అటు ఇటుగా వున్న అడ్డు కన్నుల పంచి

రేయి పగలుగ జగతికి అందజేసావు

మహేశా . . . . . శరణు .

శివా!సత్యం నీవుగ తెలిసేవు

శివమే తత్వంగా విరిసేవు

సుందర రూపున మెరిసేవు

మహేశా . . . . . శరణు .

శివా!ఓంకారానికీ ఆకారంగా నీవు

అరూపరూపిగా అగుపించు చున్నావు

అనుభూతికేలనో అందకున్నావు

మహేశా . . . . . శరణు .

శివా!నేను ,నీవు అంటూ పూజ చేసి

నేను, నీవేనంటు ధ్యానాన తెలిసి

దరి చేర తలచాను దయ నీది కాగా

మహేశా . . . . . శరణు .

శివా!ఈ లింగమున నిన్ను తెలుసుకున్నాను

ఆలింగనముగ నిన్ను హత్తుకున్నాను

ఆనంద డోలికల అవధి దాటేను.

మహేశా . . . . . శరణు .

శివా!మట్టితో అనుబంధ మెంత గొప్పదో

పుట్టి గిట్టుటలోన  నేను మట్టినే కూడి

మట్టి బొమ్మను నిను తెలిసి మురిసినాను

మహేశా . . ... . శరణు .