శివోహం

శివా!నందికి కూడి నడదారి పట్టేవు

నా మోపునీయగ మరి సిద్ధమే

అధివసించగరమ్ము ఆట విడుపుగా

మహేశా . . . . . శరణు .

శివా!లోచనములకు అందవు

ఆలోచనలకు అందేవు

అనుభూతిని పంచేవు

మహేశా . . . . . శరణు .

శివా!నాలో స్పురణగా తెలిసేవు

 నాలో స్మరణగా సాగేవు

సర్వదా శుభమలే కూర్చేవు

మహేశా . . . . . శరణు .

శివా!నాకు శ్రమ లేకుండా మనసెరిగి

వానగా వచ్చి కరుణించేవా ఇలా

అభిషేకాన అలరించేవా భళా

మహేశా . . . . . శరణు

శివా!నిన్ను చూడలేని కంటిని వెలుగైనావు

నిన్ను తెలియలేని దేహాన తేజమైనావు

చిత్రాతి చిత్రాలు అన్నీ నీ సొంతమే

మహేశా . . . . . శరణు .

శివా!నేనుగా పూజ చేసాను

నీవే నేనుగ ధ్యానం చేసాను

శరణమే వరమని అర్ధించాను

మహేశా . . . . . శరణు .

శివా!భస్మరూపాన నీ దేహాన మెరియంగ

దేహాన్ని అర్పించి దేహీ అంటున్నాను

చేరనీకు నన్ను ఆ విధాత చూపు .

మహేశా . . . . . శరణు .

శివా!మాట నీవు ఆట నీవు

పరమెరుగగ బాట నీవు

పూజ తెలిసిన చోటు నీవు

మహేశా . . . . . శరణు.

శివా!పలుకు పరుగుతీసె నిన్ను చూసి

కాలము గుణము మారె కాసుల మెరిసి

తెలుసుకొనగ తేట తెలివి తెలియక విరిసె 

మహేశా . . . . . శరణు .

శివా!ప్రాణదీపమై ప్రభవించేవు

జ్ఞాన జ్యోతిగా తెలిసేవు

ఆ వెలుగున జ్ఞానం పంచేవు

మహేశా . . . . . శరణు .

శివా!ఆశలన్నీ తీర ఆశ నాది

శ్వాసలన్నీ తీర్చు బాస నీది

నిరాశ నను చేర శ్వాస సాగనీకు

మహేశా . . . . . శరణు .