శివోహం

శివా!బయటకి వస్తే చూద్దామని  నేను

లోపలకి వస్తే కనబడదామని నీవు

ఎదురు చూపులే ఇద్దరివీ

మహేశా . . . . . శరణు .

 శివా!కదలగా లేని నీవే మమ్ము కదిలిస్తున్నావు

కనబడని నీవే మమ్ము కనబరుస్తున్నావు

మాకు ఇది చోద్యము నీకే ఇది సాధ్యము

మహేశా  .  .  .  .  .  శరణు  .

 శివా!ఈ రథమును కూర్చిన నీవే

సారథినెరిగించు వారధి దాటించు

నిను చేరుట ఎఱిగించు 

మహేశా . . . . . శరణు

శివా!కరుణించగ నీకు హద్దులు లేవు

నీ కటాక్షానికి పద్దులు లేవు

నా ఆనందానికి అవదులు లేవు

మహేశా  .  .  .  .  .  శరణు .

 శివా!ఆలింగనము కోరి అలమటించేను

ఆలకించవయ్యా నాదైన ఆర్తి

పాలించవయ్యా ఓ లింగమూర్తి.

మహేశా . . . . . శరణు .

శివా!నా ఇరుకు గుండెలో ఇమిడిన నీకు

నా ఇంటి పేరున ఇమడ ఇబ్బంది ఏమి

ఇమిడినంత నాకు అది ఎంతో ఘనము

మహేశా . . . . . శరణు .

 శివా!నీటి బుడగను మనిషిగ జేసి

ఆ మనిషి జీవితం నీటి బుడగగ జేసి

చిత్రాలు చేసేవు చిత్తాన శివుడా .

మహేశా......శరణు.

 శివా!పాదమైనా పదములైనా నిన్ను చేరుటకే

శేషమైనా విశేషమైనా నిన్ను తెలియుటకే

జననమైనా మరణమైనా నిన్ను చేరుటకే

మహేశా....శరణు.