శివోహం

 శివా!ఆద్యంతములు లేని నీతో

ఆద్యంతములు తెలియని మాకు

ఏనాటిదో ఈ అవినాభావ సంబంధం

మహేశా . . . . . శరణు .

 శివా!ఆరు వర్గాలు నన్ను అంటకుండా

వైరి వర్గాలు నన్ను అడ్డకుండా

నా వెంటనే ఉండు నన్ను బ్రోవ .

మహేశా . . . . . శరణు .

 శివా!ఈ రేయి గడిచి తెల్లారునా ?

లేక  .....  ఈ బ్రతుకు తెల్లారునా..?

నిత్య సందేహమే మాకు నిటలాక్షా.

మహేశా . . . . . శరణు.

 శివా! ఒక చిన్న మాట...

అన్ని నామాలూ నీకే ఎలా ? 

ఈ రెండు రూపాలు ఒకటిగా ఎలా ?

మహేశా ..... శరణు.

 శివా! కూడా పంపేవు కదా చావును కూడా

కాసుకొనే ఉంటోంది రాసుకొనే తిరుగుతోంది

అగుపించకున్నా అంగరక్షకుడిలా....

మహేశా ..... శరణు.

శివా!లోకాల నేలేటి ముక్కంటిరేడా

వాసాలు లేనట్టి ఓ ఇంటివాడా

మాకెట్టా తెలిసేది నీ ఇంటి జాడ

మహేశా . . . . . శరణు.

శివా!వేదాలలోవే వల్లించుతున్నాను

వాదాలు లేవని వాదించు చున్నాను

నీ పాద పూజకే ప్రార్ధించు చున్నాను

మహేశా . . . . . శరణు.